मनपा स्थायी समितीची सभा पुढे ढकलली

नांदेड, दि.24: अर्थसंकल्प तसेच विषयपत्रिकेवरील विविध विषयावर चर्चा करुन निर्णय घेण्यासाठी मंगळवारी (दि.24) आयोजित करण्यात आलेल्या महापालिका स्थायी समितीच्या दोन सभा अधिका-यांची कमी उपस्थिती असल्याच्या कारणावरुन पुढे ढकलण्यात येत असल्याचे सभापतीं उमेश पवळे यांनी सांगितले

स्थायी समिती सभापती उमेश पवळे यांच्या अध्यक्षतेखाली स्थायी समिती सभागृहात सकाळी 11 वाजता स्थायी समितीच्या सभेला सुरुवात झाली. यावेळी सदस्य स. सरजितसिंघ गील, गफ़ार खान, शंकर गाडगे, श्रध्दा चव्हाण, मोहिनी कनकदंडे तसेच प्रशासनाच्या वतीने नगरसचिव पी. पी. बंकलवाड, उपायुक्त विद्या गायकवाड,  नगररचना विभागाचे सहायक संचालक धनंजय खोत, सहायक आयुक्त डॉ. विजयकुमार मुंडे, कार्यकारी अभियंता गिरीश कदम, शैलेंद्र जाधव यांच्यासह मनपाचे अन्य विभागप्रमुख उपस्थित होते.

प्रारंभी केंद्रीय ग्रामविकास मंत्री गोपीनाथ मुंडे यांच्या निधनाबदल तसेच हिमाचल प्रदेश येथील दुर्घटनेत अभियांत्रिकीच्या 22 विद्यार्थ्यांना जलसमाधी मिळाल्यामुळे त्यांना दोन मिनिटे स्तब्ध राहून श्रध्दांजली वाहण्यात आली. सभागृहात अधिका-यांची संख्या अपेक्षेपेक्षा कमी आहे तसेच काही सदस्यही आज उपस्थित राहू शकले नाहीत. सर्वांना अर्थसंकल्पासारख्या महत्वाच्या विषयावर चर्चा करावयाची असल्याने आजची बैठक पुढे ढकलण्यात यावी, असा प्रस्ताव गफ़ार खान यांनी मांडला. गील व गाडगे यांनी त्यांना अनुमोदन दिले. सर्वांशी चर्चा करुन बैठकीची तारीख नंतर कळविण्यात येईल, असे सांगून सभापतींनी आजची बैठक स्थगित केल्याचे जाहीर केले.