मुलभूत सेवा सक्षमीकरणासाठी चौथा वित्त आयोग महापालिकेच्या पाठीशी: डांगे

       नांदेड, दि.25: महसुली उत्पन्न आणि मूलभूत सुविधांसह त्याच्या देखभालीसाठी लागणारा खर्च तसेच नागरिकांची देय क्षमता आणि गरजेची तुलना करुन लागणा-या आर्थिक मदतीची नांदेड महापालिकेने मागणी नोंदवावी. महापालिकेच्या मागण्या विचारात घेऊन योग्य त्या समर्थनासह शासनाकडे मदतीची शिफ़ारस करु, अशी ग्वाही चौथ्या वित्त आयोगाचे अध्यक्ष जे. पी. डांगे यांनी बुधवारी (दि.25) महापालिकेत आयोजित विभागप्रमुखांच्या बैठकीत दिली.

      श्री. डांगे यांनी दुपारी 3 वाजता आयुक्तांच्या बैठक दालनात सर्व विभागप्रमुखांशी संवाद साधला. मनपा आयुक्त जी. श्रीकांत यांनी त्यांचे स्वागत केले. महापालिकांच्या स्तरावरील विविध प्रकारच्या 18 सेवांच्या संबधी उत्पन्न, खर्च, शासन व इतर माध्यमातून मिळणारे अनुदान आणि फ़रकाची तूट याची माहिती नमुना 12 मध्ये देण्याचे सूचित केले. इतर भागातून महानगरात तात्पुरत्या स्वरुपात स्थलांतर होणा-या नागरिकांना सेवा देताना त्यांच्याकडून कोणतेही उत्पन्न नसेल तर त्याबाबत शासनाकडे मदतीची मागणी करावी, असेही डांगे यांनी यावेळी सुचविले.

महापालिकेतील आर्थिक, कामकाजातील वैधानिक अडचणी, महापलिका कायद्यात आवश्यकता वाटणारी सुधारणा, किचकट प्रक्रिया सुलभ करण्यासाठी करता येणारी कार्यपध्दती, अर्थसंकल्पातील तूट भरुन काढण्यासाठी योग्य प्रस्ताव, कर्जाचे हप्ते सुलभ करणे आदी बाबींसंबधी मुद्देनिहाय विश्लेषण करुन पुढच्या पाच वर्षात महापालिकेला लागणारी आर्थिक मदत, अधिकार व यंत्रणेची गरज याची सविस्तर माहिती सर्वसाधारण सभेपुढे ठेवून आयोगाकडे पाठवावी, अशी सूचनाही डांगे यांनी यावेळी केली.

      मनपा आयुक्त जी. श्रीकांत यांनी महापालिकेला नागरी सुविधा पुरविताना येणा-या विविध अडचणी विशद केल्या. महापालिका आणि शासनस्तरावरील विविध नियम, कायद्यात सुधारणा करणे, महापालिकेस आणि आयुक्तांना जादा अधिकार प्रदान करणे, अधिकारांचे विकेंद्रीकरण करणे, मनपास कमी व्याजदराचे कर्ज देऊन सुलभ हप्ते निर्माण करणे, व्हॅट, करमणूक, अकृषिक, मुद्रांक, परिवहन तसेच अन्य ज्या घटकांशी संबधित महसूली कर मनपा क्षेत्रातून कर वसुल केला जातो, त्याचा पूर्ण किंवा किमान जादा वाटा मनपास द्यावा, महापालिका सेवांना नि:शुल्क पोलिस संरक्षण पुरवावे, महापालिकेत आयुक्तांप्रमाणे इतर प्राधिकरणांनाही जबाबदार घटक मानण्यात यावे, अशा विविध मागण्या केल्या.

उपायुक्त राजेंद्र खंदारे यांनी सूत्रसंचलन करुन आभार मानले. बैठकीस जिल्हा परिषदेचे मुख्य व वित्त लेखाधिकारी बैंनवाड, मनपा उपायुक्त विद्या गायकवाड, मुख्य लेखाधिकारी पी. पी. बंकलवाड, नगररचना विभागाचे सहायक संचालक धनंजय खोत, सहाय्यक आयुक्त डॉ. विजयकुमार मुंडे, कार्यकारी अभियंता गिरीश कदम, सुग्रीव अंधारे, शैलेंद्र जाधव आदी उपस्थित होते.